Սմարթ տունը սմա՞րթ որոշում է

Շատերը կարծում են, որ սմարթ տան տեխնոլոգիաների էությունը կյանքն ավելի հարմարավետ դարձնելու մեջ է։ Դա, իհարկե, այդպես է. ձայնով կառավարել սարքերը, հեռախոսով միացնել լույսը կամ տեսնել, թե ով է դռան մոտ։ Սակայն սրանից զատ, սմարթ տունը այլ շոշափելի օգուտներ էլ է տալիս։

Այն կարող է օգնել ավելի արդյունավետ օգտագործել էլեկտրականությունը, ջեռուցման համակարգերն ու այլ ռեսուրսները՝ նվազեցնելով քո ամսական ծախսերը։ 

Ընդ որում, պարտադիր չէ միանգամից ամբողջ տունը վերածել «խելացի» տան։ Հաճախ նույնիսկ մեկ կամ երկու լուծումը կարող են նկատելի արդյունք տալ։

Ինչպե՞ս է այս ամեն ինչն աշխատում։

Սմարթ տունն օգնում է ավելի լավ տեսնել ծախսը

Խնայողության առաջին քայլը հասկանալն է, թե որտեղ և ինչպես են ծախսվում ռեսուրսները։

Շատերը չեն պատկերացնում, թե որ սարքերն են ամենաշատը էներգիա սպառում։ Շատերն էլ չգիտեն, որ «անջատված» սարքերը կարող են էներգիա սպառել սպասման ռեժիմում։

Էներգիայի մոնիթորինգի համակարգերը և սմարթ վարդակները թույլ են տալիս տեսնել սպառման իրական ծավալները։ Եվ երբ տվյալները դառնում են տեսանելի, ավելի հեշտ է հասկանալ, թե որտեղ կարելի է խնայել։

Ջեռուցում և հովացում՝ միայն անհրաժեշտության դեպքում

Կոմունալ ծախսերի զգալի մասը հաճախ բաժին է ընկնում ջեռուցման և հովացման համակարգերին։

Սմարթ թերմոստատները թույլ են տալիս սահմանել գրաֆիկներ և ավտոմատ կարգավորումներ։ Օրինակ՝ աշխատանքային ժամերին, երբ տանը ոչ ոք չկա, ջերմաստիճանը կարող է ավտոմատ նվազել, իսկ տուն վերադառնալուց առաջ՝ կրկին բարձրանալ։

Այսպիսի պարզ ավտոմատացումը ոչ միայն ապահովում է հարմարավետություն, այլև զգալիորեն կրճատում էներգիայի ծախսերը։

Սենյակի լույսը «չի մոռանում» անջատվել ։)

Քանի՞ անգամ ես դուրս եկել սենյակից և հետո հիշել, որ լույսը թողել ես միացված։

Շարժման սենսորներով կամ ժամանակացույցով աշխատող լուսավորման համակարգերը լուծում են այս խնդիրը։ Լույսերը միանում են միայն անհրաժեշտության դեպքում և ավտոմատ անջատվում, երբ սենյակում մարդ չկա։

Թվում է՝ փոքր փոփոխություն է, բայց հատկապես մեծ բնակարաններում կամ առանձնատներում այն կարող է զգալի ազդեցություն ունենալ ընդհանուր ծախսերի վրա։

Փոքր սարքեր, որոնք կանխում են մեծ կորուստները

Սմարթ տան տեխնոլոգիաները միայն էլեկտրաէներգիան չէ, որ կարգավորում են։

Օրինակ՝ ջրի արտահոսքի սենսորները կարող են ժամանակին զգուշացնել խնդիրների մասին՝ կանխելով ոչ միայն ջրի կորուստը, այլև հնարավոր վերանորոգման ծախսերը։

Նույն կերպ ավտոմատ վարագույրները կարող են օգնել ամռանը նվազեցնել սենյակի տաքացումը, իսկ ձմռանը՝ պահպանել ջերմությունը և թեթևացնել ջեռուցման և հովացման համակարգերի ծանրաբեռնվածությունը։

Բայց չէ՞ որ սմարթ տունն ինքնին թանկ հաճույք է

Շատերը կարծում են, որ սմարթ տուն կառուցելը մի ամբողջ համակարգի ներդրում է։ Բայց այն կարելի է ինտեգրել քայլ առ քայլ՝ սկսելով ամենապարզ լուծումներից։

Սմարթ վարդակները, լուսավորման ավտոմատացումը կամ էներգիայի մոնիթորինգի սարքերը համեմատաբար մատչելի են և կարող են օգնել հասկանալ, թե ինչ արդյունք են տալիս նման տեխնոլոգիաները հենց քո տանը։

Հետագայում համակարգը կարելի է աստիճանաբար ընդլայնել՝ ավելացնելով նոր հնարավորություններ և ավտոմատացումներ։

Ամփոփելով ուզում ենք ասել, որ աշխարհում սմարթ տան գաղափարը գնալով ապացուցում է իր արդյունավետությունը, դուրս է գալիս «տեխնոլոգիական նորաձևության» շրջանակից և դառնում է ստանդարտ։ 

Եթե դեռ չես օգտվում կամ չէիր էլ մտածել համակարգի ներդրման շուրջ, գուցե ժամանա՞կն է։