1. Ընդհանուր դրույթներ
1.1. Սույն պայմաններով (այսուհետ` Պայմաններ) կարգավորում են «Ամերիաբանկ» ՓԲԸ (այսուհետ՝ Բանկ)՝ անշարժ գույքերի կառավարման myhome.am հարթակում (այսուհետ` հարթակ) հաճախորդների կողմից օգտատիրոջ գրանցման, սպասարկման և օգտագործման կանոնները, ինչպես նաև հարթակի միջոցով ծառայություններից օգտվելու հետ կապված իրավահարաբերությունները:
1.2. Պայմանների իմաստով հաճախորդ է համարվում հարթակում օգտատեր գրանցող կամ ունեցող ֆիզիկական անձը:
1.3. Օգտատեր գրանցելու նպատակով պահանջվող տվյալները լրացնելով և համապատասխան հրահանգը սեղմելով` հաճախորդը դառնում է գրանցված oգտատեր (այսուհետ` օգտատեր) և համաձայնում է գործել Պայմանների շրջանակում:
2. Գրանցված օգտատերերին մատուցվող ծառայություններ
2.1. Հարթակում օգտատեր գրանցելով` հաճախորդը հնարավորություն է ստանում օգտվել հետևյալ ծառայություններից.
2.1.1. Վարկային ծառայություններ.
2.1.1.1 Վարկունակության գնահատում,
2.1.1.2. Անշարժ գույքի ձեռքբերման վարկային հայտի ներկայացում և վարկի ստացում` ներառյալ հեռավար նույնականացում, վարկային պայմանագրերի ստորագրում և այլն:
2.1.2. Անշարժ գույքի վաճառքի և/կամ վարձակալությամբ հանձնելու հետ կապված ծառայություններ.
2.1.2.1 Անշարժ գույքի վաճառքի և/կամ վարձակալությամբ հանձնելու հայտարարության հրապարակման հայտի ներկայացում,
2.1.2.2 Հաճախորդի կողմից հրապարակված հայտարարության հետ կապված այլ անձանցից հարցումների ստացում:
2.1.3. Անշարժ գույքի ձեռքբերման և/կամ վարձակալության հետ կապված ծառայություններ.
2.1.3.1. Վաճառվող և/կամ վարձակալությամբ հանձնվող անշարժ գույքի հայտարարությունների դիտում,
2.1.3.2. Հայտարարության ամրագրում, այլ անձի կողմից ապաամրագրման մասին ծանուցման ստացում,
2.1.3.3. Հաճախորդի նախընտրություններին համապատասխան հայտարարությունների որոնում,
2.1.3.4. Հայտարարությունը հրապարակած վաճառողին հարցման ուղարկում:
2.1.4. Այլ հասանելի ծառայություններ:
2.1.4.1. Հաճախորդի օգտատիրոջ էջում ինքնաշխատ կերպով արտացոլված անշարժ գույքերի` ներառյալ այդ գույքերի վերաբերյալ մանրամասների դիտում (կիրառելի է նույնականացված օգտատերերի համար),
2.1.4.2. Այլ ծառայություններ:
2.2. Բանկի կողմից սահմանված դեպքերում Հարթակի միջոցով վարկ ստանալու համար կարող է պահանջվել նույնականացում և վարկային պայմանագրերի ստորագրում Բանկի տարածքում:
3. Հարթակում օգտատիրոջ գրանցում
3.1. Հաճախորդը հարթակում oգտատեր գրանցել կարող է.
3.1.1. Հարթակ այցելելու միջոցով, որի դեպքում անհրաժեշտ է լրացնել հարթակի կողմից պահանջվող անձնական և կոնտակտային տվյալները և սահմանել Բանկի կողմից սահմանված անվտանգության նվազագույն պայմաններին բավարարող գաղտնաբառ:
3.1.2. Բանկի «ՄայԱմերիա» հեռավար սպասարկման համակարգ մուտք գործելու և դրա համապատասխան բաժնից Հարթակ այցելելու միջոցով, որի դեպքում Բանկի կողմից օգտատերը ստեղծվում է ավտոմատ, իսկ գաղտնաբառը պետք է սահմանի հաճախորդը` հետևելով իր էլեկտրոնային փոստի հասցեին ուղարկված հաղորդագրությամբ սահմանված քայլերին: Այս տարբերակով Հարթակում օգտատեր գրանցելու հնարավորությունը հասանելի է «ՄայԱմերիա» հեռավար սպասարկման համակարգի օգտագործման համապատասխան կարգավիճակ (մակարդակ) ունենալու դեպքում:
3.2. Հարթակում կատարվող գործողությունների համար հաճախորդի հետ հաղորդակցման նպատակով հիմք են ընդունվում էլեկտրոնային փոստի հասցեն և բջջային հեռախոսահամարը: Խնդրում ենք լինել ուշադիր, քանի որ սխալ կամ այլ անձի պատկանող հաղորդակցման վերոնշյալ տվյալները մուտքագրելու կամ դրանցից որևէ մեկը հիմք ընդունելու արդյունքում հաճախորդի վերաբերյալ կամ հաճախորդին ուղղված տեղեկությունը կարող է հասանելի դառնալ այլ անձանց, ինչի համար Բանկը որևէ պատասխանատվություն չի կրում:
3.3. Հարթակում օգտատեր գրանցելու, ինչպես նաև Հարթակի միջոցով Բանկի ծառայություններից օգտվելու համար Հաճախորդի կոնտակտային տվյալ(ներ)ը կարող են հավաստագրվել` Հաճախորդի կողմից այդ կոնտակտային տվյալների օգտագործման փաստը հաստատելու համար: Բանկի կողմից կարող է սահմանվել հավաստագրված կոնտակտային տվյալի վավերականության ժամկետ, որը լրանալու դեպքում hաճախորդը ստանում է համապատասխան ծանուցում Հարթակի իր օգտատիրոջ էջում` այդ կոնտակտային տվյալի վերահավաստագրման անհրաժեշտության մասին:
3.4. Հարթակում «Հաջորդ», «Հաստատում», «Ուղարկել Բանկ» հրահանգների տրամադրմամբ հաճախորդը հաստատում է և էլեկտրոնային եղանակով ներկայացնում է համապատասխան հայտեր` հաստատելով այդ գործարքներով պարտավորված լինելու իր համաձայնությունը և մտադրությունը: Հաճախորդի համաձայնությունը և մտադրությունը մասնավորապես վերաբերում է բոլոր այն գործողություններին և գրառումներին, որոնք վերջինս կատարում է Հարթակում:
4. Հարթակի օգտագործում
4.1. Հաճախորդը Հարթակի իր օգտատիրոջ էջ կարող է մուտք գործել.
4.1.1. Հարթակ այցելելու միջոցով, որի դեպքում անհրաժեշտ է լրացնել Հարթակի մուտքագնունն ու գաղտնաբառը։
4.1.2. Բանկի «ՄայԱմերիա» հեռավար սպասարկման համակարգ մուտք գործելու և դրա համապատասխան բաժնից Հարթակում Հաճախորդի օգտատիրոջ էջ ավտոմատ մուտք գործելու միջոցով: Այս տարբերակով Հարթակ մուտք գործելու հնարավորությունը հասանելի է «ՄայԱմերիա» հեռավար սպասարկման համակարգի օգտագործման համապատասխան կարգավիճակ (մակարդակ) ունենալու դեպքում:
4.2. Գաղտնաբառը մոռանալու կամ փոխելու անհրաժեշտության դեպքում համապատասխան հրահանգի տրամադրումից հետո անհրաժեշտ է հետևել էլեկտրոնային փոստի հասցեին ուղարկված հաղորդագրության մեջ նշված գործողություններին։
4.3. Հարթակում հաճախորդը կարող է բարձրացնել իր օգտատիրոջ նույնականացման աստիճանը` անցնելով ամբողջական նույնականացում, որի համար հաճախորդը պետք է տրամադրի Հարթակի կողմից պահանջվող անհրաժեշտ անձնական և կոնտակտային տվյալները և անցնի Հարթակի կողմից նույնականացման համար սահմանված հաջորդական քայլերով: Հարթակի միջոցով Բանկի առանձին ծառայությունների շրջանակներում կարող է իրականացվել տվյալ ծառայության տրամադրման համար նախատեսված հավելյալ նույնականացում:
4.4. Հաճախորդը պատասխանատվություն է կրում Հարթակում գործողությունների իսկության, ամբողջականության, արժանահավատության և դրանից բխող հետևանքների համար: Հաճախորդի կողմից Հարթակում կատարվող գործողությունները Բանկի կողմից դիտարկվելու են որպես հաճախորդի կամքի ուղղակի և իրական արտահայտում: Բանկը պատասխանատվություն չի կրում հաճախորդի կողմից կատարված տպագրական և այլ սխալների համար:
4.5. Գրանցվելով Հարթակում` հաճախորդը պարտավորվում է՝
4.5.1. պահպանել օգտատիրոջ էջ մուտք գործելու համար անհրաժեշտ տեղեկությունների գաղտնիությունը, չհրապարակել կամ երրորդ անձանց որևէ կերպ հայտնի չդարձնել հարթակում օգտատիրոջ գրանցման և Հարթակ մուտք գործելու իր գաղտնաբառերը և այլ տվյալներ կամ կատարել գործողություններ, որոնք կարող են հանգեցնել այդպիսի տվյալները երրորդ անձանց հայտնի դառնալուն,
4.5.2. Բանկին անհապաղ հայտնել համապատասխան լիազորություն չունեցող անձանց կողմից իր օգտատիրոջ էջ մուտք գործելու կամ նման փորձի մասին և/կամ իր օգտատիրոջ էջի միջոցով գործարք կատարելու կամ նման փորձի մասին,
4.5.3. հատուցել Բանկի բոլոր այն ծախսերը, կորուստներն ու վնասները, որոնք առաջացել են իր կողմից պայմանագրային պարտավորությունները և/կամ Պայմաններով սահմանված պարտավորությունները չկատարելու կամ ոչ պատշաճ կատարելու և/կամ Բանկի կողմից հաճախորդի կողմից հարթակով ստացված ցանկացած հանձնարարական կատարելու արդյունքում:
4.6. Բանկն իրավունք ունի՝
4.6.1. միակողմանիորեն փոխել Հարթակում մատուցվող ծառայությունները և/կամ դրանց մատուցման ձևը և/կամ կարգը կամ դադարեցնել մատուցվող ծառայությունները՝ ծանուցելով հաճախորդին անձամբ կամ հրապարակելով այդ մասին իր ինտերնետային կայքէջում,
4.6.2. սեփական նախաձեռնությամբ ժամանակավորապես, ամբողջովին կամ մասամբ դադարեցնել Հարթակով ծառայությունների մատուցումը՝ Հարթակի տեխնիկական սպասարկում իրականացնելու կամ վերջինիս անվտանգությունը, հուսալիությունը և անխափան աշխատանքն ապահովելու նկատառումներով: Ընդ որում, նշվածը չի կարող Բանկի համար պարտականություն լինել և ըստ այդմ, սույն կետում նշված հիմքերից ցանկացածի հիման վրա Բանկի կողմից Հարթակով ծառայությունների մատուցումը ժամանակավորապես, ամբողջովին կամ մասամբ չդադարեցնելու դեպքում վրա հասած հետևանքների համար Բանկը որևէ պատասխանատվություն չի կրում,
4.6.3. կասեցնել կամ դադարեցնել հաճախորդի կողմից Հարթակում իր օգտատիրոջ օգտագործումը Պայմանների խախտմամբ այն օգտագործվելու դեպքում, ինչպես նաև այն դեպքում, երբ Բանկը հիմքեր ունի ենթադրելու, որ հաճախորդի օգտատիրոջ էջն օգտագործվում է երրորդ անձանց կողմից: Ընդ որում, նշվածը չի կարող Բանկի համար պարտականություն լինել և ըստ այդմ, սույն կետում նշված հիմքերից ցանկացածի հիման վրա հաճախորդի օգտատիրոջը չկասեցնելու կամ չդադարեցնելու դեպքում վրա հասած հետևանքների համար Բանկը որևէ պատասխանատվություն չի կրում,
4.6.4. փողերի լվացման և ահաբեկչության ֆինանսավորման կանխարգելման և ՀՀ օրենսդրությամբ նախատեսված այլ նկատառումներից ելնելով՝ չկատարել հաճախորդի կողմից Հարթակով ներկայացված հանձնարարականները կամ կասեցնել դրանց կատարումը, որոնց վավերականությունը և/կամ օրինականությունն ակնհայտ չէ, կամ կիրառել հաճախորդի օգտատիրոջ օգտագործման այլ սահմանափակումներ:
5. Այլ պայմաններ
5.1. Բանկի կողմից հաճախորդի օգտատիրոջ էջի վրա կարող են տեղադրվել Բանկի կամ վերջինիս հետ համագործակցող Բանկի ապրանքային նշանը, ֆիրմային անվանումը և հեղինակային իրավունքով պաշտպանվող այլ տարբերանշաններ, որոնք պաշտպանված են ՀՀ օրենսդրությամբ և միջազգային պայմանագրերով, և դրանց ապօրինի օգտագործումը կարող է հանգեցնել հաճախորդի նկատմամբ պատասխանատվության միջոցների կիրառման:
5.2. Հաճախորդը տալիս է համաձայնություն առ այն, որ իր կողմից Բանկին տրամադրված տեղեկատվությունը, բիոմետրիկ տվյալները, նկարները, իր վերաբերյալ Բանկին հայտնի դարձած տեղեկատվությունը Բանկը կարող է մշակել, ձայնագրել, պահպանել և օգտագործել հաճախորդի և Բանկի միջև իրավահարաբերություններ ձևավորելու, այդ իրավահարաբերությունների վերաբերյալ որոշումներ կայացնելու համար, ինչպես նաև անհրաժեշտության դեպքում փոխանցել Բանկի հետ համագործակցող` Հարթակի տեխնիկական սպասարկում իրականացնող կազմակերպություններին` համաձայն ՀՀ օրենսդրությամբ սահմանված պահանջների:
5.3. ՀՀ օրենսդրությամբ նախատեսած իրավական հիմքերի առկայության դեպքում հաճախորդի` Հարթակին տրամադրված անձնական տվյալների ուղղման, ոչնչացման և/կամ մշակման դադարեցման վերաբերյալ հաճախորդի գրավոր դիմումը Բանկի կողմից դիտարկվում և ընթացք է տրվում ՀՀ օրենսդրությամբ և/կամ Բանկի ներքին իրավական ակտերով սահմանված կարգով և ժամկետներում:
5.4. ՀՀ օրենսդրությամբ նախատեսած իրավական հիմքերի առկայության դեպքում հաճախորդը ցանկացած պահի կարող է Բանկին ներկայացնել գրավոր պահանջ` Բանկի կողմից իր անձնական տվյալները ստանալու, մշակելու, պահպանելու, օգտագործելու և սույն փաստաթղթով տրամադրված իր մնացած համաձայնություն(ներ)ը հետ կանչելու վերաբերյալ, որը Բանկի կողմից դիտարկվում և ընթացք է տրվում ՀՀ օրենսդրությամբ և/կամ Բանկի ներքին իրավական ակտերով սահմանված կարգով և ժամկետներում: հաճախորդը տեղեկացված է նաև, որ համաձայնությունը հետ կանչելու դեպքում կարող է սահմանափակվել և(կամ) դադարեցվել Բանկի կողմից հաճախորդին ծառայությունների մատուցումը:
5.5. Հարթակում օգտատեր գրանցելով և Պայմանների ն համաձայնություն տալով` հաճախորդը համաձայնում է, որ Բանկն իրավասու է իր էլեկտրոնային փոստի հասցեին ուղարկել մարքեթինգային բնույթի առաջարկներ, Հարթակի տեխնիկածրագրային նոր լուծումների և/կամ գործառույթների վերաբերյալ ծանուցումներ:
5.6. Հարթակում օգտատեր գրանցելով և Պայմաններին համաձայնություն տալով` հաճախորդը համաձայնում է փոխհատուցել Բանկի կրած վնասներն իր օգտատիրոջ էջը ոչ պատշաճ օգտագործելու և/կամ Պայմանների խախտման, ինչպես նաև Պայմաններով ամրագրված այլ դեպքերում։
5.7. Պայմանների ն համաձայնություն տալը Բանկի համար չի առաջացնում վարկ տրամադրելու կամ այլ ծառայություն մատուցելու պարտավորություն:
5.8. Պայմանները համարվում են ընդունված հաճախորդի կողմից համաձայնության տրամադրման պահից և/կամ Հարթակում օգտատեր գրանցելու և օգտատիրոջ էջով Հարթակից օգտվելու միջոցով:
5.9. Բանկն իրավունք ունի առանց հաճախորդի լրացուցիչ համաձայնության, միակողմանիորեն փոփոխել Պայմանները` տրամադրելով այդ մասին տեղեկատվությունը` Բանկի ինտերնետային կայքէջում Պայմանները հրապարակելու միջոցով և/կամ Բանկի կողմից սահմանված այլ եղանակով: Պայմանների փոփոխություններն ուժի մեջ են մտնում Բանկի կողմից սահմանված ժամկետում:
5.10. Հարթակում օգտատեր գրանցելով և Պայմաններին համաձայնություն տալով` հաճախորդը համաձայնում է, որպեսզի Բանկը հաճախորդի կողմից տրամադրված անձնական տվյալները տրամադրի կամ այլ կերպ հասանելի դարձնի իր հետ համագործակցող երրորդ անձանց հարթակի գործունեության ապահովման և առաջխաղացման նպատակով:
5.11. Հաճախորդի կողմից անշարժ գույքի ամրագրման և/կամ ձեռքբերման վարկային հայտ ներկայացվելու դեպքում Բանկն իրավունք ունի տվյալ անշարժ գույքը վաճառող` Բանկի հետ համագործակցող կառուցապատող կամ գործակալական կազմակերպությանը տրամադրել տեղեկատվություն հաճախորդի վերաբերյալ, հաճախորդի վարկային հայտի վերաբերյալ` այդ կազմակերպության կողմից հաճախորդի վարկային հայտի ընթացքին հետևելու և տվյալ անշարժ գույքի առուվաճառքի գործարքի հետագա գործողությունները պլանավորելու նպատակով:
