Ի՞նչ հաշվի առնել մեծ ընտանիքի համար ինտերիեր պլանավորելիս
13 հունիս, 2025
Ի՞նչ ես զգում կամ մտածում, երբ լսում ես «մեծ ընտանիք»: Հավանաբար ջերմություն, ավանդույթներ, մի քիչ քաոս ու առօրյա փոքրիկ իրարանցում։ Նախասիրությունների, տարիքների, կենսակերպերի տարբերությունը, իհարկե, շատ հետաքրքիր է: Բայց մեծ ընտանիքը իր հետ բերում է նաև կենցաղը կիսելու դժվարություններ: Այնպես որ, պիտի կարողանաս ընտանիքի բոլորի անդամների կարիքները «տեղավորել» պատերի մեջ այնպես, որ չտուժի ոչ ոճը, ոչ էլ հարմարավետությունը: Իսկ այս հարցում կարևոր է գրագետ ինտերիեր դիզայնը:
Այսօր կպատմենք` ինչ է պետք հաշվի առնել տան ինտերիեր դիզայնը պլանավորելիս, եթե ունես մեծ հայկական ընտանիք:
Հարմարավետությունն ու անվտանգությունը` առաջին հերթին
Եթե նույն տան մեջ ապրելու են տարեցներ և երեխաներ, բոլորի հարմարավետությունն ու անվտանգությունն ապահովելն առաջնային է: Օրինակ՝ լոգասենյակում կարելի է տեղադրել բռնվելու հարմարանքներ և հակասահող մակերեսներ, ինչպես նաև ստեղծել հատուկ խաղային գոտի երեխաների համար։ Սեղանները, բազկաթոռներն ու բազմոցները ցանկալի է ընտրել կլորացված անկյուններով, որ ոչ ոք չվնասվի։ Ցանկալի է, որ փափուկ կահույքը լինի միջին բարձրության ու հարմարավետ թիկնակով։ Անջատիչներն էլ պետք է տեղադրել մոտ 90 սմ բարձրության վրա, որպեսզի երեխաները կարողանան հեշտությամբ օգտվել։ Որոշ տեղերում կարելի է տեղադրել էլեկտրաէներգիայի ավտոմատ անջատիչներ, որ հետո չմտածեք՝ հարազատները անջատեցի՞ն սարքերը, թե՞ ոչ։
Կահույքն ընտրելիս անպայման հաշվի առ երեսպատման նյութը. այն պետք է լինի էկոլոգիապես մաքուր և հիգիենիկ:
Բաժանիր տարածքը գոտիների
Աշխատիր տարանջատել «շփման», «հանգստի» և «աշխատանքի» գոտիները։ Սա ոչ միայն օգնում է կարգ ու կանոն պահել, այլև երբեմն «փրկում է» ընտանեկան հարաբերությունները։ Մեծ ընտանիքներում տունը պիտի լինի գրագետ բաժանված, որ մեկը կարողանա հանգիստ քնել, երբ մյուսը ճաշ է պատրաստում կամ օնլայն դասի է մասնակցում։ Լավ ձայնամեկուսացման համար կարող ես օգտագործել ձայնամեկուսիչ պանելներ, որոնք տեղադրվում են պատերին և առաստաղին։
Իսկ երեխաների սենյակի դասավորությունը կախված է նրանց թվից։ Օրինակ` կարելի է նախատեսել երկհարկանի մահճակալներ կամ վերափոխվող բազկաթոռներ։ Պատուհանի մոտ կարելի է նախատեսել գրասեղանը։
Շատ կարևոր է, որ ընտանիքի յուրաքանչյուր անդամ ունենա իր անձնական տարածքը։ Դա կարող է լինել նույնիսկ փոքրիկ գրադարակ, սեղան կամ գորգի մի հատված:
Նախատեսիր պահեստավորման տարածքներ
Մեծ ընտանիքում պահեստավորման հարցը ոչ մի դեպքում չի կարելի անտեսել։ Երբ իրերը չունեն իրենց տեղը, հայտնվում են աթոռների վրա, հատակին, դարակների վրա և դրանով խառնաշփոթ ստեղծում:
Դրա համար ստեղծիր «խելացի պահեստներ»` բազմոցների, պատերի մեջ, աստիճանների տակ։ Այս հարցում քեզ կօգնեն բազմաֆունկցիոնալ և տրանսֆորմեր կահույքը, պատի ներդիրներն ու կախովի համակարգերը։
Մի անտեսիր լուսավորությունը
Յուրաքանչյուր սենյակ պահանջում է անհատական մոտեցում լուսավորության հարցում: Ճաշասենյակում և հյուրասենյակում ցանկալի է տեղադրել կետային լույսեր, որոնք վիզուալ մեծացնում են տարածքը, խորություն հաղորդում և ընդգծում որոշ գոտիներ: Մի մոռացիր նաև լուսամփոփների մասին, որոնք բացի լուսավորելու գործառույթից, մեծ դեր են խաղում ինտերիերի ձևավորման, շեշտադրումների և տարածության վիզուալ ընդլայնման հարցում։ Իսկ երեխաների համար նախատեսված գրասեղանը լավ կլինի տեղադրել պատուհանի մոտ՝ բնական լույսի ներքո:
Հաշվի առ գույների հոգեբանությունը
Գույնը մեծ ազդեցություն ունի թե´ տրամադրության, թե´ տան մթնոլորտի վրա։ Փորձը ցույց է տալիս, որ եթե չես ընտրում նուրբ ու համահունչ գույներ, շատ արագ սկսում ես հոգնել պատերից: Չեզոք կամ տաք գույները (ավազային, պաստելային կանաչ, սպիտակի մեղմ երանգներ) ապահովում են հարմարավետության և խաղաղության զգացում բազմանդամ ընտանիքներում։ Երեխաների սենյակներում թող գույնը խոսի, բայց ընդհանուր տարածքներում կարևոր է ներդաշնակությունը։
Եվ վերջում հիշիր` տունը միայն պատերը չեն, տունը դուք եք և այն ջերմությունը, որը փոխանցում եք միմյանց: Իսկ լավ ինտերիերը այս զգացողության անտեսանելի դիրիժորն է։ Բայց եթե նրբաճաշակ կահույքը կարողանա դիմանալ նաև ձեթոտ կամ էլ թանաքոտ ձեռքերով երեխաների մատնահետքերին, շատ ավելի լավ։ )