Ինչպե՞ս դարձնել տունը pet-friendly. 5 ոչ ծախսատար միջոց, որ դու էլ, փոքրիկ ընկերդ էլ երջանիկ լինեք

Ընտանի կենդանի ունենալը շատերի համար երազանք է, բայց արի ու տես` այն «իր գինն ունի». քերծված պատեր, վնասված հատակ, շարքից դուրս եկած բազմոց և անվերջ մաքրություն:

Բայց դու խուճապի մի մատնվիր. իրականում կան միջոցներ, որոնք կօգնեն արագ և ոչ մեծ գումարով տունը դարձնել pet-friendly: Այդպիսով դու էլ, քո էլ փոքրիկ ընկերն էլ  երջանիկ կլինեք:

Այսօր MyHome-ի բլոգում պատմում ենք, թե ինչին պետք է ուշադրություն դարձնել և ինչ գործնական քայլեր ձեռնարկել դրա համար:

1. Մաքրություն և հոտերի վերացում

Տան թարմությունը պահպանելը առաջնային խնդիր է։ Թանկարժեք օդափոխության համակարգ գնելն, իհարկե, տարբերակ է, բայց  կարող ես ավելի խնայող լուծումներ էլ գտնել:

Օգտագործիր ֆերմենտային մաքրող միջոցներ

Սովորական կենցաղային քիմիան հաճախ պարզապես քողարկում է հոտը։ Փորձիր ֆերմենտային միջոցներ. դրանք պարունակում են հատուկ բակտերիաներ, որոնք քայքայում են կեղտի մասնիկները և ամբողջությամբ վերացնում հոտը։ Սա կարևոր է նաև նրա համար, որ կենդանին «աչքի տակ չառնի» տարածքը և վերադառնա նույն նպատակով : )

Ունեցիր մաքրող սարքեր 

Ունեցիր HEPA ֆիլտրով օդը մաքրող սարք։ Այն իսկական փրկություն է ընտանի կենդանիներ պահողների համար: Ֆիլտրը վերացնում է օդում «սավառնող» մազերը և թեփը, մինչ դրանք կներթափանցեն ծածկոցների, գորգի կամ այլ գործվածքների մեջ:

Օգտագործիր հոտի վերացման այլ միջոցներ

• Լվացվող ծածկոցներ: Բազմոցների վրա գցիր բամբակյա ծածկոցներ։ Եթե կեղտոտվեն էլ, արագ կգցես լվացքի մեքենան: 
• Կատվի զուգարանի գորգ: Կատվի զուգարան-ավազն անպայման պահիր օդափոխվող տարածքում: Ավազի մոտակայքում գցիր նաև հատուկ ցանցավոր գորգ, որ ավազն ու այլ մասնիկներ չտարածվեն տան մեջ:

2. Հատակի և քո փոքրիկ ընկերոջ պաշտպանությունը

Մանրահատակը կամ լամինատը չփոխելու լավագույն միջոցը «պաշտպանիչ շերտեր» ունենալն է:

Ճիշտ ընտրիր գորգը 

Ընտրիր սինթետիկ կամ կարճ մազիկներով գորգեր (օրինակ՝ պոլիպրոպիլենային). դրանք հեշտ են մաքրվում և երկարակյաց են։ Իսկ եթե նաև հեշտ լվացվող են, իմացիր` գործդ կիսով չափ թեթևացրել ես:

Սահելու դեմ միջոցներ

Կենդանիները հաճախ սայթաքում են հարթ հատակի վրա, ինչը կարող է հանգեցնել վնասվածքների. դա մեզ հաստատ պետք չէ։ Գորգերի տակ կարող ես դնել ռետինե տակդիրներ. այդպիսով գորգը չի շարժվի, երբ քո շունիկը կամ կատուն վազվզում է տանը։

Կտրիր եղունգները ժամանակին

Հավատա` հատակը քերծվացքներից պաշտպանելու ամենահուսալի և էժան միջոցը քո փոքրիկ ընկերոջ եղունգները ժամանակին կտրելն է։ 

3.Պատերի և շրիշակների պաշտպանություն

Շները սիրում են հենվել պատերին, իսկ կատուները` սուր անկյուններին: Այդ ընթացքում նրանք արտանետում իրենց մաշկի յուղերը, որոնք կարող են «իրենց հետքը թողնել»:

Ընտրիր pet-friendly ներկ

Եթե պատրաստվում ես թարմացնել պատերի ներկը, ընտրիր ատլասային կամ կիսափայլ ներկ։ Այն ավելի հեշտ է լվացվում և դիմանում է խոնավությանը` ի տարբերություն անփայլ ներկերի։

Օգտագործիր պաշտպանիչ անկյուններ

Կան թափանցիկ, գրեթե անտեսանելի պլաստիկ անկյունակներ, որոնք կպաշտպանեն քո տան անկյունները:

Տեղադրիր «ճանկռելու թիրախներ»

Կատուների մեծ մասը միշտ «թիրախավորում է» տան կամ պատի նույն հատվածը: Տեղադրիր ուղղահայաց տախտակ կամ այլ հարմարանք և թող խաղա, որքան ուզում է: Հավատա` այդպես «կփրկես» քո պաստառներն ու պատերը կատվի ճանկերից։

4. Կահույքի խելացի դասավորություն

Գուցե չհավատաս, բայց դու կարող ես կառավարել քո փոքրիկ ընկերոջ վարքագիծը՝ պարզապես ճիշտ դասավորելով կահույքը։

Բաժանիր տարածքը գոտիների

• Կերակրման գոտի: Ընտրիր տան ամենահանգիստ հատվածը։ Անպայման օգտագործիր սիլիկոնե տակդիր, որ ջուրը կամ սնունդը չթափվեն հատակին։
• Հանգստի գոտի: Օրինակ` շան քնելու տեղը կարող ես նախատեսել սեղանի տակ կամ որևէ հանգիստ վայրում։ Դա կենդանուն տալիս է իր անկյունն ունենալու և անվտանգության զգացում։

Նախատեսիր բարձր տեղեր կատվի համար

Կատուները սիրում են «բարձրության վրա լինել»։ Բայց դրա համար ամենևին էլ պարտադիր չէ պատերին հատուկ դարակներ ամրացնել։ Կարող ես պարզապես ազատել գրապահարանի վերին դարակը կամ տեղադրել «կատվի ծառեր»:

5. Անվտանգություն. պատուհաններ և պատշգամբներ

Բարձրահարկ շենքերում ապրողների համար սա երևի թե ամենակարևոր կետն է:

Տեղադրիր ցանցեր պատուհաններին

Մոծակներից ու ճանճերից պաշտպանող ցանցերը սովորաբար շատ թույլ են և կարող են չդիմանալ կենդանու ծանրությանը։ Տեղադրիր pet-resistant տիպի ամուր մետաղական կամ հատուկ թելերով հյուսված ցանցեր։ Այդպես դու շատ ավելի հանգիստ կլինես քո կենդանու համար։

Հոգա պատշգամբի անվտանգության մասին

Եթե ունես բաց պատշգամբ և ճաղերի միջև հեռավորությունն այնպիսին է, որ կատուն կամ շունը կարող են ընկնել, ուրեմն մտածելու տեղ ունես: Օգտագործիր թափանցիկ պաշտպանիչ ցանցեր, որ քո փոքրիկ ընկերը չկարողանա անցնել արանքով։

Այսպիսով` ընտանի կենդանի պահելը ոչ այնքան մեծ ծախսերի, որքան գրագետ մոտեցման հարց է։ Ճիշտ ընտրված գործվածքները, պաշտպանիչ անկյունակները և անվտանգ պատշգամբները կօգնեն քեզ ապրել քո փոքրիկ ընկերոջ հետ՝ առանց տան տեսքը «զոհաբերելու»։

Այս փոքրիկ փոփոխությունները կազատեն քեզ ապագա մեծ ծախսերից և ավելորդ սթրեսից։ Կարող ես հենց հիմա էլ քեզ համար checklist կազմել, որ հանգիստ լինես թե´ քո տան տեսքի, թե´ քո փոքրիկ ընկերոջ անվտանգության համար: