Ի՞նչ անել, որ տունը լինի և´ հարմարավետ, և´ անվտանգ

Տան նորոգումն ինչ-որ պահի ավարտվում է, իսկ կատարելագործումը՝ երբեք։ Մենք մշտապես փոփոխում ենք մեր տունը՝ իրերի դասավորությունը, դեկորացիաները, կահույքը, ավելացնում կամ պակասեցնում ենք տարբեր սարքեր ու համակարգեր։ 
Նպատակը մեկն է՝ ունենալ հարազատ միջավայր, որտեղ մեզ հարմար ու անվտանգ ենք զգում։ 
Այսօր կշարունակենք խոսել սմարթ լուծումներից և կնշենք 5 տարբերակ, որոնք կօգնեն բնակարանը դարձնել էլ ավելի հարմարավետ, անվտանգ ու ժամանակակից։ Անկախ նրանից՝ բնակարանի սեփականատեր ես, վարձակալ, նոր տուն ես փնտրում, թե պարզապես ցանկանում ես բարձրացնել անշարժ գույքիդ արժեքը, այս լուծումները զգալիորեն կհեշտացնեն քո առօրյան։

Դռան խելացի փականներ

Վստահ ենք՝ կյանքում գոնե մեկ անգամ տան բանալիները մոռացել կամ կորցրել ես։ Իսկ խելացի փականները ոչ մի տեղ չեն կորչի․ավելին՝ դրանք թույլ են տալիս բացել դուռը հեռախոսով, PIN կոդով, քարտով կամ մատնահետքով։ Իսկ դրանց որոշ մոդելներով կկարողանաս նաև․

• ստեղծել ժամանակավոր մուտքի իրավունք հյուրերի կամ սպասարկող անձնակազմի համար,
• ստանալ ծանուցումներ, թե երբ է դուռը բացվել կամ փակվել,
• հեռավար վերահսկել մուտքերն ու ելքերը։

Հարմար է, չէ՞։ 

Դռան խելացի զանգեր և տեսահսկման համակարգեր

Եթե հաճախ ես բացակայում տանից կամ պարզապես ցանկանում ես միշտ տեղեկացված լինել, թե ով է մոտեցել դռանդ, դռան խելացի զանգը կարող է լավագույն լուծումներից մեկը լինել։

Տեսախցիկով հագեցած համակարգերը թույլ են տալիս՝

• իրական ժամանակում տեսնել տանդ այցելուներին,
• խոսել նրանց հետ,
• ստանալ դռանդ դիմաց ցանկացած շարժման մասին ծանուցումներ,
• պահպանել տեսագրությունները հետագա դիտման համար։

Ջրի արտահոսքի սենսորներ

Ջրի արտահոսքի հավանականությունը երբեք հավասար չէ զրոյի, և օրվա ընթացքում ծագող այդ միտքը միայն կարող է տագնապի պատճառ դառնալ։ 

Խելացի սենսորները տեղադրվում են խոհանոցում, լոգարանում, լվացքի մեքենայի կամ ջրատարների մոտ և արտահոսք հայտնաբերելու դեպքում անմիջապես ծանուցում են քեզ։

Իսկ որոշ համակարգեր նույնիսկ կարող են ավտոմատ փակել ջրի մատակարարումը՝ կանխելով հնարավոր վնասները։ 

Ծխի և գազի դետեկտորներ

Ցավոք, գազի արտահոսքից ու կրակի բռնկումներից ոչ- ոք ապահովագրված չէ, սակայն խնդիրը ժամանակին հայտնաբերելը լուրջ վտանգներ կկանխի։

Խելացի դետեկտորները ոչ միայն ազդանշան են արձակում, այլ նաև անմիջապես ծանուցում են ուղարկում հեռախոսիդ։

Այսպիսով, ցանկացած արտակարգ իրավիճակի մասին կարող ես տեղեկանալ հնարավորինս արագ և անհրաժեշտ քայլեր ձեռնարկել։

Տանը ջերմաստիճանի կառավարման համակարգեր

Անվտանգությունն իհարկե չափազանց կարևոր է, բայց արի մեր այսօրվա զրույցն ավարտենք լավ նոտայով՝ վերադառնալով հարմարավետությանը։ 

Ջեռուցման և հովացման համակարգերը հաճախ բնակարանի ամենամեծ էներգածախսն են։

Իսկ խելացի թերմոստատները թույլ են տալիս՝

• հեռավար կարգավորել բնակարանի ջերմաստիճանը,
• ստեղծել ավտոմատ սցենարներ՝ ըստ օրվա ժամերի։

Արդյունքում դու ոչ միայն 24/7 կունենաս ցանկալի ջերմաստիճան, այլև կխնայես՝ նվազեցնելով կոմունալ սպառումներդ։

Դե ինչ, սրանք ընդամենը մի քանիսն էին այն սմարթ լուծումներից, որոնք օրեցօր ավելի մեծ տեղ են զբաղեցնում մեր առօրյայում։ Իսկ տեխնոլոգիաների զարգացմանը զուգահեռ դրանք դառնում են ավելի մատչելի ու հասանելի։

Վստահ ենք՝ շատ շուտով սմարթ տունը կդադարի լինել լրացուցիչ առավելություն և կդառնա նոր ստանդարտ։ Իսկ դրան հասնելու ճանապարհը կարող ես սկսել արդեն այսօր՝ քայլ առ քայլ ընտրելով ու ինտեգրելով այն լուծումները, որոնք լավագույնս համապատասխանում են քո կարիքներին։