Վերանորոգում սկսնակների համար. Ի՞նչն անել ինքնուրույն և ի՞նչը վստահել մասնագետներին

Դու վերջապես ստացել ես նոր տան բանալին, քո Pinterest-ի board-ը լի է գեղեցիկ նկարներով ու գաղափարներով: Ժամանակն է վերանորոգելու տունը, կյանքի կոչելու գաղափարները և, իհարկե, չանցնելու բյուջեն:

Գլխավոր հարցերից մեկը` «Ի՞նչն ինքնուրույն անել, և ի՞նչը թողնել մասնագետներին», որ և´ գումար խնայես, և´ լավ արդյունք ստանաս:

Այսօր MyHome-ի բլոգում կփորձենք պատասխանել հենց այդ հարցին: 

Իմացիր քո «աշխատանքի արժեքը» (Sweat Equity)

Երբևէ լսե՞լ ես «աշխատանքի արժեք» (sweat equity) հասկացության մասին: Մինչ մուրճը ձեռքդ առնելը անպայման մտածիր. դա այն է, ինչ դու ստեղծում ես, երբ ինքնուրույն ես անում աշխատանքը։

Հիշիր` աշխատանքը իրական արժեք է ստեղծում միայն այն դեպքում, երբ գոհ ես արդյունքից: Եթե ստիպված ես լինելու ապրել անփույթ ներկված պատերի մեջ կամ քայլել անհարթ հատակի վրա, դու արժեք չես ավելացրել, հակառակը` նվազեցրել ես այն։

Նախքան որոշում կայացնելը պատասխանիր մի քանի հարցի`

1. Արդյոք բուն աշխատանքը կամ արդյունքը կարո՞ղ են վտանգավոր լինել 
2. Արդյոք անհրաժե՞շտ են թանկարժեք գործիքներ, որոնք օգտագործելու եմ միայն մեկ անգամ
3. Եթե սխալվեմ, հնարավոր կլինի՞ ուղղել` առանց տան կառուցվածքը փոխելու 

Եթե այս հարցերից գոնե մեկին պատասխանեցիր «այո», ուրեմն առանց վարանելու դիմիր մասնագետի:

Կանաչ լույս, կամ ի՞նչը կարող ես ինքնուրույն անել

Սրանք այն աշխատանքներն են, որոնք ռիսկային չեն, բայց արդյունքը տեսանելի է առաջին հայացքից. մեծ մասամբ կոսմետիկ բնույթ ունեն, էժան են և «հեշտ ուղղվող»:

1. Ինտերիեր դիզայն և տարածքի պլանավորում

Եթե տարիներ առաջ սա հաստատ DIY (Do It Yourself) ցանկում չէր հայտնվի, ապա հիմա օնլայն գործիքներն այնքան շատ են, որ կարելի է և ինքնուրույն անել։ 

• Planner 5D: Հիանալի գործիք է, որով կարող ես ստեղծել քո տան սենյակի 3D պատկերը, հատակագիծը, որոշել դիզայնն ու կահավորել այն:
• IKEA Home Planner: Կատարյալ է խոհանոցների և պահարանների կառուցվածքը, չափսերը որոշելու համար: Կարող ես հանգիստ գծել ու հանձնել կահույքագործին: )
• Remplanner: Այս գործիքը ոչ միայն կօգնի 2D/3D պլանավորման, այլև վարդակների, անջատիչների հստակ տեղերը որոշելու և մասնագետին հանձնելու հարցում:
• Pinterest: Եթե դեռ չես հասցրել օգտվել, անպայման ստեղծիր քո ապագա տան վիզուալ mood-ը, տես, թե ինչ ոճ ես նախընտրում, որ գունային համադրություններն են առավել մոտ քեզ:

Բացի օնլայն գործիքներով նայելուց, փորձարկիր տարբերակները: Օրինակ` եթե որոշել ես բազմոցդ դնել X տեղում, վերցրու կպչուն ժապավենն ու առանձնացրու այդ հատվածը: Տես, թե որքան տեղ է մնում, հարմա՞ր է արդյոք: 

2. Պատերի և առաստաղի ներկում

Ներկումը թիվ մեկ DIY-ն է: Ներկի անգամ մեկ շերտը զգալիորեն թարմացնում է տան տեսքը: Եթե պատերն ուղիղ են և ունես լավ գործիք, որևէ դժվարություն չի լինի: Անգամ եթե որևէ բան այնպես չստացվի, մասնագետը արագ կշտկի ամեն բան:

3. Նկարների և դարակների տեղադրում

Կան աշխատանքներ, որոնք պահանջում են ոչ այնքան նեղ մասնագիտացում, այլ ... հասարակ պտուտակահան կամ գայլիկոն ու մի քանի մեխ: Դրանց գնումը արդարացված ծախս է, քանի որ այս գործիքները հաստատ մի օր պետք կգան:

• Լոգասենյակի/խոհանոցի աքսեսուարներ: Կախիչների, զուգարանի թղթի ամրակների տեղադրումը պարզ: Միայն ուշադիր եղիր, որ չվնասես պատերի այն մասերը, որտեղով լար կամ խողովակ է անցնում: Դրա համար կարող ես օգտվել հատուկ սարքից (դետեկտոր): Բայց լավ կլինի, որ վերանորոգման սկզբնական փուլում խնդրես մասնագետներին, որ քեզ փոխանցեն պատերի նկարները, որտեղ կերևան խողովակներն ու լարերը:
• Կախովի դարակներ: Այս հարցում էլ քեզ պետք է ճշգրտություն և գայլիկոն: Ուշադրություն դարձրու լարերին, իսկ եթե պատը գիպսաստվարաթղթից է, առավել ապահով կլինի ծակել պանելի ամուր հատվածները:
• Կտավների ու պաստառների կախում: Այստեղ անգամ պատը ծակելու կարիք չկա: Կարող ես գտնել դրա համար նախատեսված ինքնակպչուններ։

4. Կահույքի հավաքում 

Կարծում ես` ինչո՞ւ է համաշխարհային հսկա IKEA-ն առաջարկում ինքնուրույն հավաքել կահույքը: Այն, ինչ քո ձեռքով ես անում, ավելի թանկ է քեզ համար: Ուղղակի ուշադիր նայիր ուղեցույցը, վերցրու սարքն ու անցիր գործի:

Կարմիր լույս, կամ ի՞նչը թողնել մասնագետներին 

Կարմիր գոտում ռիսկային աշխատանքներն են. անգամ մեկ սխալը կարող է վտանգավոր և ծախսատար լինել: Այնպես որ, այս աշխատանքները քեզ վրա վերցնելն այնքան է լավ միտք չէ (եթե իհարկե ինքդ մասնագետ չես):

1. Էլեկտրական աշխատանքներ

Լարեր միացնելուց, նոր վարդակ կամ անջատիչ տեղադրելուց առաջ մի պահ կանգ առ: Էլեկտրահարում, «կարճ միացում», անգամ հրդեհ. պատրա՞ստ ես այս ռիսկերին:

2. Սանտեխնիկա 

Պատկերացնո՞ւմ ես` ինչի առաջ կկագնես, եթե վերանորոգումից հետո խողովակից կամ միացման տեղից ջուր ծորա: Իսկ պատի ներսում դանդաղ արտահոսքը կարող է բորբոս և փտում առաջացնել։

3. Մակերեսի հարթեցում

Եթե հատակի ծածկույթը տեղադրվի անհարթ հատակի վրա, շատ արագ կարող է կոտրվել կամ բաժանվել։

4. Կառուցվածքային փոփոխություններ

Եթե մտածել ես տան կառուցվածքի շատ ավելի հարմար տարբերակ, և այն պատը խանգարում է քեզ. այստեղ էլ մի պահ կանգ առ: Գաղափարդ գուցե շատ լավն է, բայց ի՞նչ, եթե դա «կրող» պատ է: 

DIY-ի թաքնված ծախսերը. ժամանակ և գործիքներ

X աշխատանքն ինքնուրո՞ւյն անել, թե՞ մասնագետին դիմել. արագ մի քանի հաշվարկ կատարիր:

Գործիքի գինը և արժեքը երկարաժամկետում։ Օրինակ` եթե աշխատանքը պահանջում է 50 000 դրամանոց գործիք, որը հետագայում դժվար էլ օգտագործես, դա արդարացվա՞ծ ծախս է:

Ծախսվող Ժամանակը։ Մասնագետների թիմը կարող է ներկել ամբողջ բնակարանը 2 օրում, դու` դժվար թե: Կշեռքի մի նժարին դիր քո ազատ ժամանակը, մյուսին` ծախսվելիք գումարը:

Պատրա՞ստ ես սկսել

Վերանորոգումը դժվար է, ոչ ոք չի կարող ժխտել: Բայց դա այն գինն է, որը պետք է վճարես հենց քո երազանքների տունն ունենալու համար: Նյարդեր խնայելու ու չհիասթափվելու համար ճիշտ պլանավորիր բյուջեդ, օգտվիր հատուկ առաջարկներից և գրագետ բաշխիր աշխատանքը: Հիմա արդեն գիտես` ինչը կարելի է անել ինքնուրույն և ինչը` ոչ մի դեպքում: )